ފަސްއެބުރި ބެލުމެއްނެތި ކާމިޔާބާއި އެކު ކުރިއަށް - ލަންދޫ ޓީމް

ފަސްއެބުރި ބެލުމެއްނެތި ކާމިޔާބާއި އެކު ކުރިއަށް - ލަންދޫ ޓީމް

ލިޔުނީ : މިހާސް

ލަންދޫ ފުޓްބޯޅަ ޓީމުން އެޓީމްކުޅުނު އެކުވެރި ކަމުގެ ފަސްވަނަ މެޗު މިއަދު ހަވީރު ކެނދިކޮޅު ޓީމާއި ބައްދަލްކޮށް 3 ލަނޑު 2 ލަނޑުން ކާމިޔާބު ކޮށްފިއެވެ.

ރަށުގައި މިވަގުތުއޮތް ހަމަ އެކަނި މަދަނީ ޖަމްޢިއޔާ ކަމުގައިވާ " ލިޔެސް " ގެ ނަމުގައި ކުޅުނު މިމެޗު ވެގެން ގޮސްފައިވަނީ ވަރަށް ފޯރިގަދަ ވާދަވެރި ކުޅުމެއް ފެނިގެން ދިޔަ މެޗެއް ކަމުގައެވެ.

ލަންދޫގައި ކުޅެވޭ މިފަދަ ގިނަ މެޗުތަކުގައި ރެފްރީކަން ކޮށްދެއްވާ ނ.ލަންދޫ މުސްތަރީގޭ އަލްފާޟިލް އަޙްމަދު މުޙައްމަދު ( ޕަޓޭ ) ގެ ރެފްރީ ކަމުގައި ކުޅެވުނު މިމެޗުގެ ކުރީކޮޅު ހިތްގައިމު ޕާސްތަކަކާއި އެކު މޮޅަށް ކުޅެފައިވަނީ ކެނދިކޮޅު ޓީމުންނެވެ. މިވަގުތުކޮޅު ތެރޭގައި ކެނދިކޮޅު ޓީމަށް ލަނޑުޖަހާނެ މުޅިން ހުސްފުރުޞަތުތަކެއް ލިބި ބޭކާރު ވެގެން ގޮސްފައިވެއެވެ.

ކެނދިކޮޅު ޓީމަށް ލިބުނު ހުސްފުރުޞަތުތައް ބޭނުން ނުކުރެވުމުގެ ފައިދާ ނަގާ ލަންދޫ ޓީމްގެ ތަޖުރިބާ ކާރު ހުނަރުވެރި ކުޅުންތެރިޔާ ޔޫސުފް ޢަބުދުއްރަޙީމް ( ޔޫއްޓޭ ) ކެނދިކޮޅު ޓީމް ހާފްގެ އޭރިޔާގެ ބޭރުގައި ހުރެފަ ޖެހި ބާރު ބޯޅަ ގޯލްގެ ތެރެއަށް ވައްދާލައިގެން ލަންދޫ ޓީމަށް ހިނިތުނވުން ގެނެސް ދިނެވެ. މިލަނޑު ޔޫއްޓޭ ޖަހާފައިވަނީ ފުރަތަމަ ހާފްގެ 24 ވަނަ މިނެޓް ގައެވެ.

ޔޫއްޓޭގެ މިލަނޑަށް ފަހު ލަންދޫގެ " ލިޔެސް " ޓީމުން ކުޅުންރަނގަޅުކޮށް މެޗުގެ ކޮންޓްރޯލް އެމީހުން އަތުލިތަން ފެނިގެން ދިޔައެވެ. ނަތީޖާއަކަށް ވެގެން ދިޔައީ ފެށުނު އިރު ރަނގަޅު ކުޅުމެއް ދައްކަމުން ގެންދިޔަ ކެނދިކޮޅު ޓީމްގެ ކުޅުން ގެއްލިގެން ދިޔުމެވެ. މި ދަޑިވަޅުގައި މިއަދުގެ މެޗުގައި ލަންދޫ ޓީމުން ރަނގަޅު ކުޅުމެއް ދެއްކި އަޙްމަދު ރަޝީދު ( ލައިބު ) އަރާ ކެނދިކޮޅު ޓީމް އޭރިޔާ ބޭރުގައި ހުރެ މަތިންބޯޅަ ޖަހާ ގޯލަށް ވައްދާލައިގެން މެޗުގެ 40 ވަނަ މިނިޓްގައި ލަންދޫ ޓީމްގެ ދެވަނަ ގޯލް ކާމިޔާބު ކުރިއެވެ. މިއީ މި ސީޒަނުގައި ލަންދޫ ޓީމަށް ލައިބު ޖަހައިދިން 3 ވަނަ ގޯލެވެ. މިގޯލާއި އެކު މިވަގުތާއި ހިސާބަށް " ލަންދޫ އިންފޯ " ރަންބޫޓަށް ވާދަ ކުރާ ކުޅުންތެރިންގެ ތެރެއިން އެންމެ ކުރީގައި އުޅޭ ކުޅުންތެރިއަކަށްވެސް ލައިބު ވެގެން ދިޔައީއެވެ.

ފުރަތަމަ ހާފް މި ސްކޯރގައި އޮވެ ނިމުމުން ދެވަނަ ހާފް ލަންދޫ ޓީމުން ފަށާފައިވަނީ މި މެޗުގައި ކުޅުނު އެންމެ ޒުވާން ކުޅުންތެރިޔާ އިބުރާޙިމް ސައުދު ( ސައުދުﷲ ) ގެ ބަދަލްގައި އޭނާ ގެ ބޭބެ ހަސަން ސައިފް ( ސައިއްޕޭ ) އެރުވުމަށް ފަހުގައެވެ. ދެވަނަ ހާފް ފެށި މާގިނަ އިރުތަކެއް ނުވަނީސް ކެނދިކޮޅަށް ލިބުނު އެއްލުމެއްގައި ލަންދޫ ޓީމްގެ ޑީފެންސް ލައިނަށާއި ކީޕަރ އަށް ހެދުނު ގޯހެއްގެ ފައިދާ ނަގާ ފަހުހާފުގެ 10 ވަނަ މިނިޓްގައި ކެނދިކޮޅު ޓީމްގެ ފުރަތަމަ ގޯލް އެޓީމްގެ 16 ނަމްބަރ ޖެހިއެވެ.

މިލަނޑާއި އެކު ލަންދޫ ޓީމްގެ މެދުތެރެއަށް ކުޅުނު މަޖޫ ބޭލުމަށްފަހު ނަސީމް ( ޓިންޓޮން ) ކުޅެން އެރުވިއެވެ. ރެފްރީ ނާންގަނިސް ޓިން ދަނޑަށް އެރުމުން މެޗުގެ ރެފްރީ ޕަޓޭ ވަނީ ޓިން އަށް ރީދޫ ކާޑެއްވެސް ދައްކާފައެވެ.

މިހާފްގައި ދެޓީމްގެ ފަރާތުންވެސް ފެނިގެން ގޮސްފައިވަނީ ވަރަށް ފިޒިކަލީ ކުޅުމެކެވެ. ނަމަވެސް މާބޮޑު ހަމަ ނުޖެހުމެއް ހިގާފައެއް ނުވެއެވެ. މިހާފްގައި ލަންދޫ ޓީމަށް ސީޓޭގެ ބަދަލްގައި ކުޅެން ނިކުތް ރެޑޭއަށް މުޅިން ހުސް ފުރުޞަތެއް ލިބުމުގެ އިތުރުން މިމެޗުގައި ހިތްގައިމު މޮޅުގޯލެއް ޖެހުމުގެ ކުރިން މިދުވަސްކޮޅު ގޯލާއި ރައްޓެހި ނޫން ކަމަށް ބެލެވުނު ހުސެއިން ޖަވާދު ( ޖަވާ ) އަށްވެސް ގޯލް ޖަހާނެ ރަނގަޅު ދެފުރުޞަތެއް ލިބިގެން ގޮސްފައިވެއެވެ. ވަރަށް ހަނި އެންގަލްއަކުން ހިތްގައިމު ގޮތަކަށް ރީތި ގޯލެއް ޖަވާ ލިޔެސް ޓީމަށް ޖަހައިދީފައިވަނީ ފަހު ހާފުގެ 38 ވަނަ މިނެޓްގައެވެ. ޖަވާގެ މިލަނޑަށް ފަހު ލައިބުގެ ބަދަލްގައި ހަސަންޖާވިދު ( ޖޯރޭ ) އާއި ޓިންގެ ބަދަލްގައި ޝިނާނު ޢަބުދުލް ޤަނީ ( ސިންނޭ ) ކުޅެން ނެރެވުނެވެ. މިބަދަލާއި އެކު ލަންދޫ ޓީމްގެ ކުޅުން ވަރުގަދަ ވީނަމަވެސް ކެނދިކޮޅު ޓީމް އުފެއްދި ކައުންޓަ އެޓޭކެއްގައި އެޓީމުގެ ދެވަނަ ލަނޑު މެޗުގެ 42 ވަނަ މިނިޓްގައި އެޓީމްގެ11 ނަމްބަރ އެޓީމަށް ކާމިޔާބު ކޮށްދިނެވެ.

" ލިޔެސް " ގެ ނަމުގައި މިއަދު ނިކުތް ލަންދޫ ޓީމްގައި ހިމެނޭ ކޮންމެ ކުޅުންތެރިޔަކުވެސް ވަނީ ވަރަށް މޮޅު ކުޅުމެއް ދައްކާފައެވެ.

ލަންދޫ ޓީމުން ހޯދަމުން މިދާ ކާމިޔާބީތައް ފާހަގަކޮށް މިޓީމަށް މި ސައިޓްގެ ފަރާތުން ވަރަށް ހޫނު މަރުޙަބާއަކާއި ތަޙްނިޔާއެއް ރައްދު ކުރަމެވެ.